इलेक्ट्रिक फ्लाइंग टॅक्सी

Blog No. 2023/45        

Date: 21st, February 2023

  

मित्रांनो,

           कल्पना करा तुम्ही पुण्यात रहात आहात.बाणेरला तुमचे घर आहे आणि तुम्हाला ऑफिसला हडपसरला जायचे आहे. तुम्हाला हडपसरला पोहोचायला कमीतकमी सव्वा तास वेळ लागणार हे निश्चित.हे गुगल मॅप वरुन  सांगतो आहे.पण काही दिवसांनी किंवा महिन्यांनी हेच अंतर तुम्ही 15 मिनिटांत पार करू शकाल.असे मी तुम्हाला सांगितले तर  तुमचा विश्वास बसणार नाही,बरोबर ना.पण मित्रांनो बंगळुरु मधील एरो इंडिया शोमधे ईप्लेन कंपनीच्या नॉन-फ्लाइंग प्रोटोटाइप मॉडेलने अनेकांचे लक्ष वेधून घेतले आहे.ही एक इलेक्ट्रिक फ्लाइंग टॅक्सी आहे.

 

ई-प्लेन कंपनीचे उद्दिष्ट

            आयआयटी मद्रास येथे इनकुबेटेड ईप्लेन कंपनीची स्थापना प्राध्यापक सत्य चक्रवर्ती यांनी केली आहे. त्यांनी रस्त्यावरील वाहतूक कोंडी आणि त्यामुळे प्रवासास लागणारा वेळ कमी करण्याचे उद्देश्यातून काम करण्यास सुरुवात केली.शहरांतर्गत प्रवास आणि मालवाहतूक जलद करण्यासाठी त्यांनी ईप्लेन-ई-200 हे मॉडेल डिझाईन केले आहे. ही भारतातील पहिली कॉम्पॅक्ट इलेक्ट्रिक फ्लाइंग टॅक्सी असेल. ही टॅक्सी एकदा पूर्ण चार्ज झाली की 200 किमी एवढी धावू शकेल. ही कॅब सारख्या रोडवर धावणाऱ्या वाहनापेक्षा 10 पट अधिक वेगवान आहे. ह्या टॅक्सीची स्पीड ही 160 किमी/प्रतितास ते 200 किमी/प्रतितास एवढी असेल. ह्या टॅक्सीत ड्रायवर आणि दोन माणसे किंवा ड्रायवर आणि 200 किलो वजनाचे सामान वाहून नेता येईल.लोकांना हे अर्बन एयर मोबीलिटी वाहन सुरक्षित आणि शाश्वत उड्डाणाचा आनंद देईल.        

 

इलेक्ट्रिक फ्लाइंग टॅक्सी वाहतुकीचे प्रकार

              इलेक्ट्रिक फ्लाइंग टॅक्सी वाहतुकीचे  दोन प्रकार असतील.एक माल वाहतूक आणि दूसरा प्रकार दररोज शहरांतर्गत प्रवासी वाहतूक.ह्या विमानाचे डिझाईन आणि प्रोटोटाइपना DGCA अर्थात Director General of Civil Aviation  ची मान्यता मिळवावी लागेल. 2024-25 पावेतो DGCA ची मान्यता मिळेल आणि बंगळुरु मधे  ई-फ्लाइंग टॅक्सी सुरू केली जाण्याची शक्यता आहे. असे मत कंपनीचे संस्थापक विष्णु रामकृष्णन यांनी व्यक्त केले. ही टॅक्सी पारंपरिक हेलिकॉप्टरपेक्षा चांगली आहे असे देखिल विष्णु रामकृष्णन म्हणाले.कारण हेलिकॉप्टर साठी हेलीपॅड लागते पण ही टॅक्सी अपार्टमेंटच्या छतावरून किंवा 1600 चौरस फुट एवढ्या मोकळ्या जागेत टेक ऑफ करु शकेल.ही टॅक्सी बॅटरीवर चालत असल्याने हिचे भाडे देखिल कमी असेल.तथापि, भविष्यात स्वायत्त तंत्रज्ञान देण्याचा स्टार्टअपचा मानस आहे. तथापि, एरो इंडिया शोमध्ये फ्लाइंग टॅक्सी कृतीत दाखवली गेली नाही. कंपनी e200 साठी एका बॅटरी चार्जवर 10 ते 15 किमी (जवळपास 10 मैलांपर्यंत) सुमारे 10 छोट्या ट्रिप करण्याचे लक्ष्य ठेवत आहे. 

        परदेशात ह्या दृष्टीने नवनवीन स्टार्ट अप्स इलेक्ट्रिक फ्लाइंग टॅक्सीचे उत्पादनाच्या क्षेत्रात उतरल्या आहेत. यूनायटेड एयरलाइन्सने 500 फ्लाइंग टॅक्सीची ऑर्डर सुद्धा निर्मात्यांना देऊन टाकली आहे.

                आता काही प्रश्न माझ्या मनांत उभे ठाकले आहेत. ते तुमच्या देखिल मनांत उभे ठाकले आहेत. ते असे :-

         1. ह्या टॅक्सीची किंमत बरीच जास्त असेल तर ती विकत कोण घेईल? ह्याचे उत्तर असे असू शकेल की ह्यात देशांतर्गत हवाई वाहतूक करणाऱ्या कंपन्या ह्या टॅक्सी  विकत घेतील आणि चालवायला देतील. 

      2.ड्रायवर म्हणजे पायलटला ती टॅक्सी चालवायचे विशेष प्रशिक्षण घ्यावे लागेल. त्यातील प्रशिक्षण संस्था लागतील कां?   

       3.त्या टॅक्सीचा मार्ग कसा असेल म्हणजे एरिएल रुट असेल की रोडच्या वरुनच जाईल. हे मार्ग कोण निर्धारित करेल. 

      4. ह्या टॅक्सीचा काही कुणी ट्राफिक कंट्रोलर असेल कां? कारण ही टॅक्सी 457 मिटर एवढ्या उंचीपर्यंत उड्डाण करु शकेल.

     5.त्यां टॅक्सीच्या बॅटरी दर 200 किमी नंतर चार्ज कराव्या लागतील. त्यामुळे त्यासाठी वेगळे चार्जिंग स्टेशन लागतील. 

          अर्थात ही टॅक्सी जेव्हा प्रत्यक्षात येईल त्यावेळी सगळ्याच प्रश्नांची उत्तरे मिळतीलच.हे सारे प्रत्यक्षात उतरले तर ट्राफिक जाम फ्री बंगळुरु,पुणे,हैदराबाद पहायला मिळेल. ही कंपनी त्यांचे स्वप्न लवकर पूर्ण करो.अशी आशा करु या.        

       

  

                          प्रसाद नातु,पुणे