दिवसभरात करता येतील असे 10 व्यायाम प्रकार

 ब्लॉग नं: 2025/197.

दिनांक: 17 जुलै, 2025.

मित्रांनो,

            आजकाल मोठमोठया शहरात लोकांना नोकरीसाठी महत्प्रयास करत जावं लागतं. कष्टाच्या नोकरीपेक्षा देखील कष्टाचं घरुन नोकरीच्या ठिकाणी आणि परत घरी येणं झालंय.अशा वेळी वेळ काढून जिमला जाणं अनेकांना जमत नाही.छोट्या शहरात किंवा गावात जिमची सुविधा मोठ्या प्रमाणात उपलब्ध नसते. अशा त्याला पर्याय म्हणून दिवसभरात सहज करता येतील असे 10 व्यायामाचे प्रकार माझ्या वाचनात आले,ते आजच्या या ब्लॉगद्वारे मी सविस्तर उपलब्ध करुन देत आहे.   

सविस्तर:

आपल्यापैकी कित्येकांना जिमला जाणे किंवा तासन्‌तास व्यायाम करणे जमत नाही. पण काही सवयी बदलून आपण आपल्या शरीराला तंदुरुस्त ठेवू शकतो.

आज आपण या दहा  सोपे व्यायाम प्रकार आपण जाणून घेऊ. 

🌟 1. लिफ्टऐवजी जिना वापरा:

साधारणतः या तुमचा फ्लॅट तिसऱ्या मजल्यावर असेल,तर तेवढे जिने उतरून जाणे आणि चढून येणे शक्य आहे.सकाळी मॉर्निंग वॉकला जातांना आणि परत घरी येतांना लिफ्ट ऐवजी जिना वापरा,किंवा ऑफिसला जातांना आणि परत येतांना तुम्ही जिन्याचा वापर करा. ऑफिस किंवा घरात लिफ्टकडे न जाता जिन्याने चढा-उतरा. यामुळे पायांना आणि फुफ्फुसांना चांगला व्यायाम मिळतो.

🌟 2. जास्त वेळ बसू नका:

दर 30-40 मिनिटांनी खुर्चीतून उठून दोन मिनिटे चालून या किंवा अंग ताणून घ्या. तुमचा बैठा जॉब असेल तर,मधूनच पाणी प्यायला जाण्यासाठी किंवा सहज दोन मिनिटे चालून या.तेवढे सुद्धा केलेत तर पाय मोकळे होतील.   

🌟 3. फोनवर बोलताना फिरा:

मोबाईलवर बोलत असाल तर एका जागी उभं न राहता,खोलीत फेरफटका मारत मोबाईलवर संभाषण करा.त्यामुळे देखील पाय मोकळे होण्यास मदत होईल.     .

🌟 4. टीव्ही बघताना हलका व्यायाम:

टीव्ही बघतानाच काही बैठे,एका जागेवर उभे राहून करायचे किंवा खाली जमिनीवर बसून  करायचे व्यायाम जसे स्क्वॅट्स, स्ट्रेचिंग किंवा थोडा पुल-अप करा.तेवढे केलेत तरी शरीराला थोडा व्यायाम मिळेल. 

🌟 5. दिवसाची सुरुवात ५ मिनिटांच्या व्यायामाने करा.

सकाळी फक्त ५ मिनिटे सूर्यनमस्कार किंवा स्ट्रेचेस केल्याने दिवस हलका वाटतो.

🌟 6. जवळच्या ठिकाणी चालत जा:

बाइक किंवा गाडी न वापरता जवळच्या ठिकाणी चालत जा – चालणे हे उत्तम व्यायाम आहे.आजकाल खूप जण अगदी 100 मीटर देखील चालत नाहीत.जिथे शक्य असेल तिथे पायी जायची सवय लावून घ्या.    

🌟 7. कामाच्या वेळी तसेच जेवतांना ताठ बसा आणि श्वसनावर लक्ष द्या:

बऱ्याच लोकांना पाठीला पोक काढून बसायची सवय असते,त्याऐवजी ताठ बसलं तर त्याचे अनेक फायदे शरीराला होतात. योग्य आसन आणि खोल श्वास घेणे मानसिक आणि शारीरिक आरोग्यासाठी फायदेशीर.

🌟 8. घरकामात सक्रिय व्हा:

झाडू-पोछा, बागकाम, या क्रियांमध्ये देखिल भरपूर व्यायाम होऊ शकतो त्यामुळे यालाही व्यायाम समजा.

🌟 9. झोपण्यापूर्वी 5 मिनिटे स्ट्रेचिंग:

रात्री झोपण्याआधी थोडे स्ट्रेचिंग केल्याने शरीर सैल होते आणि झोप चांगली लागते.

🌟 10.ऑफिसमध्ये बसूनही व्यायाम करा:

ऑफिसमध्ये बसल्या बसल्या देखिल काही बैठे व्यायाम प्रकार करता येतात जसे खांदे, मान, मनगट, पाय यासाठी काही seating exercises दररोज करा.

समारोप:

मित्रांनो, शरीराला कुठलीही क्रिया न करता राहिले तर निश्चितपणे त्रास होतो. माझं विशेषतः तरुण लोकांना सांगणे आहे, कि जेवढी जमेल तेवढी हालचाल करीत चला. स्नायूंचे वस्तुमान आणि ताकद सामान्यतः, एखाद्या व्यक्तीच्या 30 किंवा 40 च्या दशकात, कधीतरी कमी होण्यास सुरुवात होते, ही प्रक्रिया सारकोपेनिया म्हणून ओळखली जाते. स्नायूंचे हे नुकसान आयुष्यभर चालू राहते, परंतु 65 किंवा 80 वर्षांच्या वयानंतर घट होण्याचे प्रमाण वाढू शकते. स्नायूंचे नुकसान हे वृद्धत्वाचा एक नैसर्गिक भाग असले तरी, निष्क्रियतेमुळे ते वाढू शकते.     

आजचा ब्लॉग तुम्हाला कसा वाटला,हे कमेन्ट बॉक्स मध्ये जरूर लिहा. पुन्हा भेटूया उद्याच्या ब्लॉग मध्ये तोपर्यंत आपली आणि आपल्या परिवाराची काळजी घ्या. स्वस्थ रहा,आनंदी रहा,मस्त जगा. 

 

✍🏻 लेखक: प्रसाद नातु

(आरोग्य व जीवनशैली विषयक लेखक)

📝 टीप: हा लेख केवळ माहितीपुरता आहे. कोणताही वैद्यकीय सल्ला घेण्यासाठी आपल्या डॉक्टरांशी संपर्क करावा.