घर विकत घेताना घ्यायची काळजी

 ब्लॉग नं  2025/102.

दिनांक: 13 एप्रिल, 2025. 

मित्रांनो,

            परवाच मी माझ्या या वर्षीच्या 100 व्या ब्लॉगमध्ये आरबीआयने रेपो दरात कपात केल्यानंतर पंजाब नॅशनल बँक, बँक ऑफ इंडिया, इंडियन बँक आणि युको बँक यांनी त्यांच्या कर्ज दरांमध्ये 35 बेसिस पॉइंट्सपर्यंत कपात करण्याची घोषणा केली आहे असे लिहिले होते. इंडियन बँकेचा नवीन दर 8.70%, पीएनबीचा 8.85 %, बँक ऑफ इंडियाचा 8.85 % आणि युको बँकेचा दर 8.80% आहे हे देखिल लिहिले होते.आता गृह कर्जाचा EMI कमी होणार म्हटल्यावर बरेच जण गृह कर्ज घेण्याचा विचार करत असतील,तर त्यासाठीच घर विकत घेण्यासाठी काय काळजी घ्यावी,यावर आजचा ब्लॉग लिहीत आहे.             

सविस्तर:

            आज काल स्वतःचे घर हे सेवानिवृत्तीच्या आधी किंवा सर्व जबाबदाऱ्यातून सुटका झाल्यावर विकत घ्यायचं वगैरे गोष्टी जशा इतिहासजमा झाल्या.तसचं स्वतःच घर एकदाच होतं,वगैरे ही कन्सेप्ट सुद्धा जुनी झाली.एकाच आयुष्यात दोन तीन घरे विकत घेणारे मी बघितलेत आणि तुम्ही बघत असाल.पण म्हणून घर घेणे ही सोपी गोष्ट नाही,कारण त्यात मोठ्या प्रमाणात पैसा गुंतलेला असतो.त्यामुळे सावधानी ही आज देखिल घ्यावी लागतेच.तर यातील महत्वाच्या गोष्टी खालीलप्रमाणे.  

1.   30 वर्षाचा सर्च रिपोर्ट:- तुम्ही होम लोन घेऊन घर घेत असाल तर तुमची बँक तुम्हाला सर्च रिपोर्ट वकिलाकडून काढून घ्यायला सांगेलच.पण एखादी बँक सांगत नसेल किंवा तुम्ही स्वतःच्या पैशाने घर घेत असाल,तरी सर्च रिपोर्ट एखाद्या ओळखीच्या वकिलांकडून काढून घ्या. सर्च रिपोर्ट मध्ये गेल्या तीस वर्षात त्या घराचे title म्हणजे मालकी कितीदा आणि कुणाकडून कुणाकडे ट्रान्सफर झाली हे दिलेले असते. त्या सोबतच त्या मालमत्तेवर कुठल्या बँकेचा/वित्तीय संस्थेचा बोजा आहे कां? हे लिहिलेले असते.वर्तमान मालकाचा मालकी हक्क वैध आहे कां? हे लिहिलेले असते.ती मालमत्ता कुठल्याही वादात गुंतलेली नाही,हे जाणून घेता येते.वकील त्या मालमत्तेचा नकाशा सोबत जोडत असतो.त्यात मालमत्तेकडे जाण्यास वैध रास्ता (valid approach road)आहे कां हे बघून घ्यावे.तेव्हा सर्च रिपोर्ट हे अतिशय महत्वाचे दस्तावेज आहे,हे लक्षात ठेवावे.

2.   जुना फ्लॅट घेत असल्यास 1.जर फ्लॅट नोंदणीकृत सोसायटीमध्ये असेल तर,सोसायटी ड्यूज् up-to-date भरलेले आहे ना हे तपासून घ्यावे.  2. एमएसईबी चे बिल भरलेले आहे किंवा नाही ते तपासून घ्यावे. 3. प्रॉपर्टी टॅक्स भरलेला आहे किंवा नाही ते तपासून घ्यावे.4. प्रॉपर्टी कार्डवर किंवा इंडेक्स II वर कुठलाही बोजा नाही हे तपासून घ्यावे. 5. सोसायटीचे भागधारक प्रमाणपत्र पाहून घ्यावे.की त्यावर वर्तमान घर मालकाचे नावं आहे किंवा नाही.

3.   नवीन फ्लॅट घेतेवेळी या सोबत बँक करुन घेत असेल तर ठीक आहे. अन्यथा वॅल्यूएशन रिपोर्ट एखाद्या रजिस्टर्ड आर्किटेक्ट कडून घ्यावा.त्यावरुन घराचे government वॅल्यूएशन, मार्केट वॅल्यू इत्यादि गोष्टी कळतात.आपल्याकडून घराचा/फ्लॅटचा योग्य भाव आकाराला जात आहे की नाही हे तपासून पाहता येते.

4.   कागदपत्रे व्यवस्थित तपासून घ्या: घर घेत असतांना तुमचे पॅन कार्ड,आधार कार्ड हे लागतेच.या गोष्टी रजिस्ट्रार ऑफिसमधे लागतात.स्टॅम्प ड्यूटी,रजिस्ट्रेशन फी ही योग्य आकारली जाते आहे ना, हे तपासून घ्या. खरेदी खत पूर्ण वाचून घ्या. सर्च रिपोर्ट,घराची जुनी registry आणि खरेदी खतात मालमत्तेचा योग्य उल्लेख आहे ना हे बघून घ्या.तुमचे नांव,वय,पॅन नंबर,कर्ज घेतले असल्यास बँकेचे नांव,कर्जाची रक्कम,खरेदी खताची रक्कम हे सारे बरोबर आहे ना,हे तपासून घ्या.कारण एखादी चूक महागात पडू शकते.कारण ती सुधरविण्यासाठी करेक्शन डीड करावे लागेल आणि त्यात वेळ आणि पैसा व्यर्थ वाया जाईल.

5.   CIBIL रिपोर्ट पाहून घ्या: होम लोन घेत असाल तर तुमचा CIBIL रिपोर्ट बँक काढून घेईल. CIBIL स्कोर प्रमाणे व्याजाचा दर निश्चित करण्यात येतो.म्हणून CIBIL कार्ड चांगले ठेवा.बँक लोन साठी सॅलरी स्लिप,फोरम 16, इन्कमटॅक्स रिटर्नची गरज पडते.बँकेचे स्वीकृती प्रमाणपत्र नीट वाचा.काही hidden टर्म्स नाहीत ना, म्हणजे होम लोनची माहिती देतांना न सांगितलेल्या टर्म्स नाहीत ना,हे नीट वाचून पहा.

सारांश

            बँक लोन घेत असतांना देखिल सर्व दस्तावेज तपासून घ्याच,कारण लोन बँक देत असली तरी घर आपलं आहे.त्यामुळे सर्व काही तपासून घ्या.घर घेत असतांना तुम्हाला काही अडचणी आल्या किंवा शंका असल्यास तुम्ही माझ्या मेल आयडीवर संपर्क करू शकता.हा सल्ला मोफत असेल (मोल आकारणार नाही),पण म्हणून मोलाचा नसेल असे नाही.माझा मेल आयडी pknatoo25360@gmail.com आहे.   

            आजचा हा ब्लॉग तुम्हाला कसा वाटला,हे कमेन्ट बॉक्स मध्ये जरूर लिहा. पुन्हा भेटूया उद्याच्या ब्लॉग मध्ये तोपर्यंत आपली आणि आपल्या परिवाराची काळजी घ्या. स्वस्थ रहा,आनंदी रहा,मस्त जगा. 

 

प्रसाद नातु,पुणे.