बुलेट बाबा मंदिर

 

Blog No. 2023/16 

Dated 19th, January 2024.  

मित्रांनो,  

               आपण काही वेळेस काही ठिकाणांना जातो,त्या वेळेस आपल्या काही तरी वेगळेच बघायला मिळतं. बासरला ज्ञान सरस्वतीचे दर्शन हा एक प्रसन्न अनुभव आणि तिथे शिक्षणाचा श्रीगणेशा गिरविण्यास आलेली लहान लहान मुले पाहून कुतुहुल वाटले होते अन काही नवीन अनुभवल्याचे समाधान.देवी देवतांची मंदिरे खूप आहेत पण एका मोटरसायकलच्या मंदिराबद्दल कधी ऐकलेत कां? “बुलेट बाबा मंदिर”, हो चक्क बुलेट मोटरसायकलचे मंदिराबद्दल मी ऐकलेच नाही तर पहिले देखिल. आजचा हा ब्लॉग त्यालाच समर्पित.      

 अजमेरहून जोधपुरकडे

नोव्हेबर 2019 मधे मी माझ्या नोकरीतील शेवटच्या एलटीसीला राजस्थानला गेलो होतो.या ट्रीपमधे मधे 9 नोव्हेबरला,दुपारी 12 च्या सुमारास,आम्ही अजमेर सोडलं अन जोधपूर कडे निघालो.बरेच लांबचे अंतर असल्याने,मधे एक दोन ठिकाणी,चहा साठी कार थांबवली.पण जोधपूर जेव्हा फक्त 50 किमी दूर होतं,तेव्हा त्याने कार थांबवली.तेव्हा मी त्याला विचारलं,अभी क्यो रोक दी कार, तर तो म्हणाला,सर,बुलेट बाबा का मंदिर है.फुल,प्रसाद चढाकर आता हूं.आईये आप भी.पाहिले तर एक बुलेट ठेवली होती आणि लोक तिलाच हार चढवत होते.प्रसाद चढवत होते.कार सुरू केल्यावर,मी कमलेश ला विचारलं, हा काय प्रकार आहे आणि जे ऐकले ते खरोखरचं अमेझिंग आहे. 

बुलेट बाबा मंदिराची कहाणी

खरं तर या जागी,2-4 हॉटेल्स,15-20 हार-फुले,प्रसादाची दुकानं आणि एक मंदिर या शिवाय दुसरे काहीच नव्हतं.या ठिकाणची कहाणी अशी आहे कि,ओम बन्ना उर्फ ओम सिंह राठोड,हा ठाकूर जोग सिंह राठोड,ह्यांचा मुलगा.तो पाली जवळील चोटिला या गांवचा रहिवासी होता.साधारणतः 1991 च्या हिवाळ्यांत,ओम आपल्या गावाकडे, रात्रीच्या वेळेस,आपल्या बुलेट 350 वर चालला होता.त्याचा अपघात झाला आणि या अपघातातच,त्याचा दुर्देवी मृत्यू झाला.पोलिसांना ही बातमी मिळताच,त्यांनी पंचनामा करून,बुलेट ताब्यात घेतली आणि पोलिस ठाण्यात आणून ठेवली.आणि आश्चर्य म्हणजे, सकाळी पोलिस बघतात तर, ती बुलेट ठाण्यातून गायब झाली होती. पोलिसांनी शोध सुरू केला आणि त्यांना कळले,कि बुलेट अपघाताच्या जागी आहे.पोलिसांनी पुन्हा बुलेट ताब्यात घेतली आणि या वेळेस टॅंक पूर्ण रिकामी करून,ठाण्यांत ठेवली.पण दुसऱ्या दिवशी सकाळी,बुलेट गायब होती आणि ती पोलिसांना,अपघाताच्या ठिकाणीच सापडली.पोलिसांनी आता मात्र ती साखळ दंडांनी बांधून ठेवली.तरी तेच.अनेक नाना क्लुप्त्या करून देखिल,हेच घडत होते. 

 बुलेट बाबा मंदिराची स्थापना

शेवटी गावकऱ्यांच्या आग्रहाने आणि जोग सिंह ठाकूरांच्या विनंतीनुसार,ती बुलेट अपघाताच्या ठिकाणीच,ठेवण्यात आली.कालांतराने तिथे एक चबूतरा बांधण्यात आला.तिथे ओम बन्ना चा मोठा फोटो आणि बुलेट ठेवण्यांत आली.अशी आख्यायिका आहे की,ओम बन्ना त्या रोडवरून जाणाऱ्याचे रक्षण करतो.तिथे गाडी अचानक  थांबते किंवा स्लो होते.लोक खाली उतरून ओम बन्ना आणि बुलेटला फुल माला अर्पण करतात आणि पुढे जातात.त्या ठिकाणाला अक्षरशः तीर्थ क्षॆत्राचे स्वरूप प्राप्त झालयं. तिथे हाय वे वर धावणारे,प्रत्येक वाहन थांबत होते.हार फुले घेऊन,लोक ओम बन्ना आणि बुलेटला अर्पण करित होते आणि पुढे जात होते. इतकेच काय तर उदयपूर मध्ये देखिल,ओम बन्नाचे मंदिर बांधल्याचे कळले.माझा अशा गोष्टीवर विश्वास नसला,तरी स्थानिकांच्या श्रध्देपुढे,कधी कधी आपल्याला ही नत मस्तक होणे भाग पडते हेच खरे. कुणाच्याही श्रध्दांना ठेच पोहोचविणे,मला कधी जमलं नाही,सुचलं नाही किंवा तसे करावेसे देखिल वाटले नाही.कारण आपल्या स्वतःच्या देखिल काही श्रध्दा असतात.त्यावर कुणाचे कमेंटस,आपल्याला चालत नाहीत.तेव्हा तसे मलाही करण्याचा अधिकार नाही.प्रत्येकाने दुसऱ्यांच्या श्रध्दांना जपलं,तर निरर्थक वाद टळतो हेच खरे. 

तर अशी आहे अनोखी कहाणी ह्या बुलेट बाबाची,जी मला राजस्थानात अनुभवास मिळाली.

                                                     

 

प्रसाद नातु, पुणे.