ब्लॉग नं. 2026/1 55 . दिनांक: 4 जून , 2026. मित्रांनो, आजकाल आरशासमोर उभं राहिल्यावर , अनेकांच्या कपाळावर आठ्या पडतात , त्याचं कारण म्हणजे कंगव्यात किंवा स्नान करताना,हातात येणारे केसांचे पुंजके ! "अरेरे , माझे केस खूप गळतायत , मला टक्कल तर पडणार नाही ना ?" ही भीती आजकालच्या तरुणाईपासून ते पन्नाशीतील व्यक्तींपर्यंत,प्रत्येकालाच सतावते आहे. पण कधी विचार केलाय का , की नक्की टक्कल का पडते ? यामागे कोणती विज्ञानाची सूत्रं आहेत आणि आपण नकळत कोणत्या चुका करतोय ? चला तर मग , आजच्या या ब्लॉगमध्ये आपण टक्कल पडण्यामागचं नेमकं विज्ञान , आपली बदलती जीवनशैली आणि यावरील उपायांचा सविस्तर आढावा घेऊया. सविस्तरः 1. मानसिक ताण आणि टक्कल पडण्याचा संबंध: आपल्याकडे एक मजेशीर विनोद नेहमी केला जातो,"मला टक्कल पडत चाललंय या चिंतेनेच,माझे केस जास्त गळायला लागलेत !" यात विनोदाचा भाग सोडला , तरी हे अक्षरशः शंभर टक्के खरे आहे.आजच्या धावपळीच्या युगात,मानसिक ताणतणाव ( Stress) आणि सततची चिंता,हे आपल्या आरोग्याचे मोठे शत्रू बनले आहेत.जेव्हा आपण जास्त ताण घेतो , तेव्हा शरीरातील संप्...
ब्लॉग नं. 2026/088.
दिनांक: 29 मार्च, 2026.
मित्रांनो,
☀️ उन्हाळ्याच्या झळांपासून स्वतःला वाचवा:
उहाळा सुरू झाला,प्रत्येक ऋतुच्या काही चांगल्या गोष्टी आहेत,तशाच काही त्रासदायक गोष्टी.लहानपणचे उन्हाळ्याचे दिवस काही वेगळेच असायचे. त्या वेळेस चांगली दोन महिन्यांची सुट्टी असायची.एवढा रखरखीत उन्हाळा नसायचा किंवा जाणवत नसेल. पण उन्हाळा हा सगळ्यात चांगला ऋतु वाटत असे.आजकाल मुलांना मार्चमध्ये परीक्षा झाली की,एप्रिलमध्ये पुढच्या वर्गाची शाळा आणि मेमध्ये सुट्टी.आणि जूनपासून पुन्हा शाळा सुरू.नैसर्गिक उपाय आणि आरोग्यदायी आहार यांच्या आधारे उन्हाळ्यापासून स्वतःला वाचवा.आजच्या ब्लॉगमधे यासाठीचे उपाय आपण सविस्तर जाणून घेऊ .
सविस्तरः
उन्हाळा सुरू झाला की,वाढत्या तापमानाचा आपल्या शरीरावर विपरीत परिणाम होऊ लागतो. डिहायड्रेशन (पाणी कमी होणे), पित्त वाढणे आणि अस्वस्थता जाणवणे, या समस्या सामान्य होतात. जर आपण योग्य वेळी काळजी घेतली नाही, तर उष्णतेचे अनेक गंभीर विकार जडू शकतात. आजच्या या ब्लॉगमधे आपण पाहणार आहोत की, नैसर्गिक पद्धतीने शरीर थंड कसे ठेवायचे आणि उन्हाळ्यात कोणता आहार घ्यावा.
उन्हाळ्यात शरीराचे तापमान संतुलित ठेवण्यासाठी 'योग' आणि 'सवयी':
प्राचीन भारतीय विज्ञानानुसार, आपल्या शरीरातील 'चंद्रनाडी' शरीराला थंडावा देते. उष्णता कमी करण्यासाठी खालील उपाय नक्की करून पहा:
* प्राणायाम: नियमित प्राणायाम आणि विशेषतः अनुलोम-विलोम केल्याने शरीराचे तापमान स्थिर राहते.
* चंद्रनाडी सक्रिय करा: आपली उजवी नाकपुडी बंद करून,डाव्या नाकपुडीने श्वास घेतल्यास शरीरात नैसर्गिक गारवा तयार होतो.यासाठी उजव्या कुशीवर झोपणे फायदेशीर ठरते,ज्यामुळे डावी नाकपुडी आपोआप सुरू राहते.
* पाणी पिण्याची पद्धत: घटाघटा पाणी न पिता, माठातील किंवा कोमट पाणी बसून सावकाश चवीने प्यावे. सकाळी उठल्यावर लगेच 1-2 ग्लास कोमट पाणी पिणे शरीरासाठी उत्तम असते.
काय खावे आणि काय टाळावे?
उन्हाळ्यात आहार हा औषधासारखा असतो. चुकीच्या आहारामुळे उष्णता अधिक वाढू शकते.
✅ उन्हाळ्यासाठी सर्वोत्तम 'थंड' पदार्थ:
* फळे आणि भाज्या: कलिंगड, सफरचंद, चिकू, डाळिंब, काकडी, कोबी, दुधी भोपळा, कोथिंबीर आणि पुदिना.
* पेये: कोकम सरबत, लिंबू सरबत, ताक, मठ्ठा, नारळ पाणी आणि साखर न घातलेला उसाचा रस.
* इतर: पांढरा कांदा (जेवणात), सब्जा बी, जिरे पूड घालून केलेले ताक आणि देशी गाईचे तूप.
❌ उष्णता वाढवणारे 'गरम' पदार्थ (टाळावेत):
* फळे: आंबा, पपई, अननस.
* भाज्या: कारले, मिरची, वांगे, गवार, मेथी.
* ड्राय फ्रूट्स: बदाम, काजू, अक्रोड, खजूर.
* इतर: चहा, कॉफी, बाजरी, नाचणी, गुळ आणि मांसाहारी पदार्थ (मटण, चिकन).
* विशेष टीप: बर्फाचा वापर टाळावा. बर्फ स्वभावाने गरम असतो आणि शरीरातील उष्णता वाढवतो.
काही महत्त्वाच्या टिप्स (Quick Tips):
* उन्हातून आल्यावर: लगेच फक्त थंड पाणी पिण्याऐवजी,थोडे गूळ-पाणी प्यावे.
* पाय आणि बेंबी: रात्री झोपताना तळपायांना,खोबरेल तेल चोळावे आणि बेंबीत थोडे तेल घालावे.यामुळे शरीरातील उष्णता शोषली जाते.
* पित्त टाळा: उन्हाळ्यात हलका आहार घ्या आणि पोट साफ ठेवा.पित्त वाढल्यास खडीसाखर खाणे फायदेशीर ठरते.
* संरक्षण: घराबाहेर पडताना छत्री, कॅप किंवा गॉगलचा वापर नक्की करा.
समारोप:
निसर्गाने आपल्याला प्रत्येक ऋतूशी जुळवून घेण्यासाठी,अनेक सोपे मार्ग दिले आहेत.वरील साध्या उपायांचा अवलंब केला तर आपण उन्हाळ्याचा त्रास न होता या ऋतूचा आनंद घेऊ शकतो.
आजचा हा ब्लॉग तुम्हाला कसा वाटला,हे कमेन्ट बॉक्स मध्ये जरूर लिहा. पुन्हा भेटूया उद्याच्या ब्लॉग मध्ये तोपर्यंत आपली आणि आपल्या परिवाराची काळजी घ्या. स्वस्थ रहा,आनंदी रहा,मस्त जगा.
प्रसाद नातु.
(आरोग्य आणि जीवनशैली विषयांवर लेखन करणारे लेखक)
📝 अस्वीकरण: हा लेख केवळ माहितीवर आणि या क्षेत्रातील तज्ञांनी व्यक्त केलेल्या मतांवर आधारित आहे. कोणताही वैद्यकीय सल्ला घेण्यासाठी आपल्या डॉक्टरांशी संपर्क करावा.
महत्त्वपूर्ण माहिती
ReplyDelete