घुम घुम घुम घुमर रे घुमे

 Blog No.2023/223            

Date:- 25^th, August 2023.

 मित्रांनो,

        “घुम घुम घुम घुमर घुमे” हे गाणं गुणगुणतंच आपण टॉकीजच्या बाहेर पडतो. परवा मी अभिषेक बच्चन आणि सयामी खेर यांच्या प्रमुख भूमिका असलेला “घूमर” हा चित्रपट पीव्हीआर मॉलला जाऊन बघितला. खेळांवर आधारित असलेले चित्रपट बरेच आले.पण त्याहून वेगळा,असं या चित्रपटाबद्दल म्हणता येईल.या चित्रपटाला रेटिंग द्यायचं म्हटलं तर मी 5 पैकी 4 रेटिंग देईन.या चित्रपटाबद्दलहा आजचा ब्लॉग.

घूमरची कहाणी

       “घूमर” मध्ये अनिना म्हणजेच सयामी खेर ही एक महिला क्रिकेटप्लेयर,चांगली बॅट्समन असते. तिची इंग्लंडला जाणाऱ्या महिला क्रिकेट टीम मध्ये निवड होते.संघ निवडीच्या वेळेस जेव्हा निवडसमितीचे लोक क्रिकेटपटूंना अजमावून पहात असतात, त्या ठिकाणी क्रिकेट क्लबमध्ये एक माजी क्रिकेटपटू पदमसिंह सोधी जो बोलर असतो. तो तिथे मैदानावर येतो.अनिना त्यावेळेस बॅटिंग करत असते.तिथे उपस्थित असलेले कोच आणि इतर पदाधिकारी त्याला मैदानावर जाण्यास विरोध करतात.तरी तो मी अनिनाला फक्त एक बॉल टाकतो म्हणत असतो आणि तो बॉल तकतोच.  ती तो बॉल खेळू शकत नाही. ती क्लीन बोल्ड होते.

              पदमसिंह सोधी तिथून कोणालाही सिलेक्ट करतात वगैरे बडबड करत निघून जातो.दुसऱ्या दिवशी क्रिकेट क्लबमध्ये निवड झालेल्या क्रिकेटची celebration पार्टी असते. नित्य नेमाप्रमाणे पदमसिंह सोधी तिथे दारू प्यायला येतो. त्याला क्रिकेट क्लबचे पदाधिकारी हटकण्याचा प्रयत्न करतात. तरी तो आंत शिरतो आणि सयामीला तिच्या निवडीबद्दल दोष देतो. ती निराश होऊन तिथून निघून जाते.ती कारमधून जात असतांना तिचा अपघात होतो आणि ती तिचा उजवा हात कोपरापासून गमावून बसते.ती खूप निराश होते. तिची आजी शबाना आजमी आणि तिचे वडीलही निराश होता. सयामी मला आता जगायचे नाही म्हणतं असते तेव्हा पदमसिंह सोधी तिथे येतो आणि तिला म्हणतो तू पुढील वर्षी क्रिकेट टीममध्ये निवडली जाशील म्हणतो.

               तो त्यासाठी तिला कसे प्रोत्साहित करतो, तिची कठोर परीक्षा घेतो, शेवटी तिची निवड क्रिकेट टीम मध्ये होते कां? अमिताभ बच्चनचा नेमका रोल काय हे जाणून घ्यायचे असेल तर चित्रपट बघावा लागेल.अभिषेक बच्चन खरं तर एक चांगला अभिनेता आहे,गुणी कलावंत आहे, पण अमिताभच्या टॉवरिंग पर्सनॅलिटीमुळे निश्चितच त्याच्यातील कलाकारांवर अन्याय होतो आहे.अभिषेकचा एक संवाद “लाइफ लॉजिक का खेल नही मॅजिक का खेल है” त्याने खूप प्रभावीपणे सादर केला आहे. सयामी खेरने खूप सुंदर अभिनय केला आहे. शबाना आझमीने देखिल दादीच्या भूमिकेत अगदी सहज सुंदर अभिनय केला आहे.अमिताभ नेहमीप्रमाणे पडदा व्यापून टाकतो.   बाकीचे कलाकार माझ्या ओळखीचे नाहीत.पण त्यांनी त्यांना दिलेल्या भूमिका सुरेख पार पाडल्या आहेत.

               आर बाळकृष्णन जो आर.बाल्की या नावाने ओळखला जातो.त्याचे आधीचे दिग्दर्शित केलेले चित्रपट म्हणजे “चीनी कम”, “पा”, “शमिताभ”, “कि अँड का”, “पॅडमॅन”, “मिशन मंगल”, “चूप:रिव्हेन्ज ऑफ अॅन आर्टिस्ट”. अशा हटके चित्रपटांसाठी प्रसिद्ध आहे.श्रीदेवीचा इंग्लिश-विगलिश” हा त्याने दिग्दर्शित केला नसला तरी याचा निर्माता आर.बाल्की हाच आहे. या चित्रपटात गाणी विशेष लक्षात ठेवण्यासारखी नाहीत. त्यातल्या त्यात “घूम घूम घूम घूमर घुमे” हे टाइटल सॉन्ग परिणामकारक झाले आहे.

 

 

सारांश                              

               आजकाल चित्रपट पहायचा म्हटलं की मॉलमध्ये जाऊन पाहावा लागतो. तिथे उपस्थित प्रेक्षकांच्या संख्येवरून चित्रपट हिट की फ्लॉप काही अंदाज येतं नाही. चित्रपटाचा ट्रेलर बघितला आणि बघायची इच्छा झाली.बरेच दिवसांत म्हणजे द केरला स्टोरी नंतर पाहिलेला नाही. बघावा आणि एक ब्लॉग लिहावा. म्हणून बघितला पण. घूमर अजिबात कंटाळवाणा नाही,गती चांगली ठेवली आहे.एकदा अवश्य बघावा.

आजचा हा ब्लॉग तुम्हाला कसा वाटला,हे कमेन्ट बॉक्स मध्ये जरूर लिहा. पुन्हा भेटूया उद्याच्या ब्लॉग मध्ये तोपर्यंत आपली आणि आपल्या परिवाराची काळजी घ्या. स्वस्थ रहा,आनंदी रहा,मस्त जगा. 

 प्रसाद नातु,पुणे

 रेटिंग ****      

photo courtesy @hindustan times