दीर्घ काळ चालणे विसरा, करा हा घरगुती व्यायाम

ब्लॉग नं: 2026/170.

दिनांक: 19 जून,2026.

मित्रांनो,

दीर्घकाळ चालणे विसरा,आता हृदय आणि रक्तातील साखर सुरक्षित ठेवण्यासाठी,अपोलोच्या न्यूरोलॉजिस्टनी सुचवला आहे, एक सोपा घरगुती व्यायाम प्रकार.आजकालच्या धावपळीच्या आणि आधुनिक जीवनशैलीत,आपल्यापैकी बहुतांश लोकांचा बराचसा वेळ,खुर्चीवर बसून घालवला जातो.दिवसभर ऑफिसमध्ये किंवा घरून काम करताना,तासनतास एकाच जागी बसून राहणे,ही आता सामान्य बाब झाली आहे.अनेकदा आपण स्वतःची समजूत घालतो की, दिवसभर जरी बसून राहिलो तरी,संध्याकाळी अर्धा-एक तास "लाँग वॉक" (दीर्घकाळ चालणे) करून,आपण ते भरून काढू. पण अपोलो हॉस्पिटलचे प्रसिद्ध न्यूरोलॉजिस्ट डॉ. सुधीर कुमार यांच्या मते,हा तुमचा गैरसमज आहे.संध्याकाळचे चालणे,दिवसभराच्या बसण्यामुळे होणारे नुकसान पूर्णपणे भरून काढू शकत नाही. या समस्येवर डॉ. सुधीर कुमार यांनी एक अतिशय सोपा आणि प्रभावी उपाय सुचवला आहे, जो तुम्ही तुमच्या घरात किंवा ऑफिसमध्ये खुर्ची शेजारी उभे राहून सहज करू शकता,या व्यायाम प्रकाराबद्दल आजच्या ब्लॉगमध्ये आपण जाणून घेणार आहोत.

सविस्तर:

तासनतास बसून राहण्याचे धोके आणि डॉक्टरांचा सल्ला: 

डॉ. सुधीर कुमार यांनी सोशल मीडिया प्लॅटफॉर्म 'X' (पूर्वीचे ट्विटर) वर,एक महत्त्वाची माहिती शेअर केली आहे.त्यांच्या मते,जे लोक कामानिमित्त किंवा टीव्ही पाहताना,तासनतास एकाच जागी बसून राहतात, त्यांच्यामध्ये लठ्ठपणा,मधुमेह (डायबिटीज) आणि हृदयविकाराचा धोका लक्षणीयरीत्या वाढतो.दिवसभराच्या या निष्क्रियतेची कसर,संध्याकाळच्या एका वर्कआउटने भरून निघत नाही.

यावर उपाय म्हणून त्यांनी सांगितले की, दर 45 मिनिटांनी फक्त 10 स्क्वॉट्स मारणे,हे संध्याकाळच्या 30 मिनिटांच्या सलग चालण्यापेक्षा,रक्तातील साखरेची पातळी (Blood Sugar Levels) नियंत्रित ठेवण्यासाठी अधिक प्रभावी ठरते.जेव्हा आपण सातत्याने लहान-लहान अंतराने हालचाल करतो,तेव्हा शरीराची चयापचय क्रिया (Metabolism) गतिमान राहते.त्यामुळे दर 45 मिनिटांनी तीन मिनिटांचे लहान वॉक्स घेणे किंवा 10  स्क्वॉट्स काढणे शरीरासाठी अत्यंत फायदेशीर ठरते.

स्क्वॉट्सचे शरीराला होणारे फायदे:        

'हेल्थलाईन'च्या अहवालानुसार,स्क्वॉट्स हा एक मूलभूत आणि अत्यंत प्रभावी व्यायाम प्रकार आहे. यामध्ये एकाच वेळी शरीरातील अनेक स्नायू आणि सांध्यांचा वापर होतो,ज्यामुळे शरीराची ताकद आणि लवचिकता वाढते.

1.लोअर बॉडी मजबूत होते: स्क्वॉट्स प्रामुख्याने,तुमच्या शरीराच्या खालच्या भागावर,म्हणजेच नितंब (Glutes), मांड्यांचे स्नायू (Quadriceps, Hamstrings),हिप फ्लेक्सर्स आणि पायांच्या घोट्यांवर काम करतात.यामुळे पायांना चांगला आकार आणि ताकद मिळते.

2.कोअर स्नायू आणि पोश्चर सुधारते:  हा व्यायाम करताना पाठीचा कणा आणि पोटाचे स्नायू (Core Muscles) सक्रिय होतात.यामुळे शरीराची ठेवण (Posture) सुधारते आणि पाठीच्या दुखापतीचा धोका कमी होतो.

3.दैनंदिन कामात मदत: नियमित स्क्वॉट्स केल्याने चालणे,पायऱ्या चढणे-उतरणे किंवा वजन उचलणे यांसारखी रोजची कामे करणे अधिक सोपे जाते.

4.कॅलरी बर्न होतात: हा एक उत्तम कम्पाउंड व्यायाम असल्याने,शरीरातील अतिरिक्त कॅलरीज वेगाने बर्न होतात आणि वजन नियंत्रणात राहण्यास मदत होते.

समारोप:  

स्क्वॉट्स करण्यासाठी,तुम्हाला कोणत्याही जिमच्या उपकरणांची किंवा महागड्या साहित्याची गरज नसते. हा व्यायाम तुम्ही तुमच्या शरीराच्या वजनाचा (Bodyweight Squat) वापर करून,कधीही आणि कुठेही करू शकता. त्यामुळे पुढच्या वेळी,जेव्हा तुमचे स्मार्टवॉच तुम्हाला "Stand Up" (उभे राहा) अशी आठवण करून देईल,तेव्हा फक्त उभे राहू नका, तर लगेच 10 स्क्वॉट्स नक्की करा. तुमचे शरीर या छोट्याशा बदलाबद्दल तुमचे मनापासून आभार मानेल !

आजचा हा ब्लॉग तुम्हाला कसा वाटला,हे कमेन्ट बॉक्स मध्ये जरूर लिहा. पुन्हा भेटूया उद्याच्या ब्लॉग मध्ये तोपर्यंत आपली आणि आपल्या परिवाराची काळजी घ्या. स्वस्थ रहा,आनंदी रहा,मस्त जगा. 

प्रसाद नातु.

होलीस्टिक हेल्थकोच

(आरोग्य आणि जीवनशैली विषयांवर लेखन करणारे लेखक)

📝 टीप: हा लेख केवळ माहितीपुरता आहे. कोणताही वैद्यकीय सल्ला घेण्यासाठी आपल्या डॉक्टरांशी संपर्क करावा.