जोडप्यांचे प्रकार

ब्लॉग सं. 2025/147.

दिनांकः 28 मे, 2025.

मित्रांनो, 

हा ब्लॉग आज लिहायचं कारण म्हणजे,आज आमच्या लग्नाचा वाढदिवस.मध्यंतरी,कुठेतरी मी वाचलं होतं की,जोडप्यांचे भिन्न प्रकार असतात.मला आज हेच जाणून घ्यावसं वाटलं की,आपलं जोडपं नेमकं कुठल्या प्रकारात मोडत.जोडप्यांमधील एकमेकांमधील नातेसंबंध,व्यवहार, संवाद,विचारांची देवाणघेवाण हे लक्षात घेऊन एक संशोधन करण्यात आले आणि विषयसाधर्म्य असलेली एक इंग्लिश मालिका, यांत ही भिन्न जोडपी उलगडून दाखविण्यात आले,सांगण्यात आले. आजच्या ब्लॉगमध्ये आपण हे भिन्न प्रकार जाणून घेणार आहोत.

सविस्तर:

गिलॉम प्ले यांच्या व्हिडिओ पॉडकास्ट मालिकेतील "लेजेंड" च्या एका भागात सांगितले आहे की, "सर्व जोडपी सारखीच असतात किंवा जवळजवळ सारखीच असतात." सेक्सोलॉजिस्ट आणि कपल्स थेरपिस्ट गिल्बर्ट बो जौदे यांनी,जोडप्यांच्या नात्यांना समजून घेण्यासाठी,एक साधी परंतु प्रभावी चौकट मांडली आहे. त्यांच्या म्हणण्यानुसार पाच प्रकारची जोडपी असतात,जी प्रेम अनुभवण्याचे विविध पाच मार्ग दाखवतात.चला आजच्या ब्लॉगमध्ये या पाच प्रकारच्या जोडप्यांची माहिती करून घेऊ.

सविस्तर: 

गिल्बर्ट बो जौदे जोडप्यांच्या नात्यांचे गुण-वैगुण्य मोजत नाहीत किंवा त्यांना गुणांक देत नाहीत. त्यांच्यासाठी प्रत्येक जोडपे हे स्वतःचे अनोखे नाते सांगते.त्यांच्या निरीक्षणाने आणि सल्ल्यानुसार जोडप्यांचे पाच मुख्य प्रकार पुढे आले आहेत. ही प्रकारवारी कोणताही निष्कर्ष काढण्यासाठी नाही, तर नात्याला अधिक चांगल्या प्रकारे समजून घेण्यासाठी आणि ते कसे कार्य करते याचा विचार करण्यासाठी आहे.

1. फ्यूजन कपल

"फ्यूजन कपल" म्हणजे एकमेकांमध्ये पूर्णपणे विलीन झालेली जोडपी.हे जोडपे प्रत्येक गोष्ट एकत्र करते. त्यांची समान मित्रमंडळी,समान आवडी आणि कधीकधी समान सोशल मीडिया अकाउंटही असतं.त्यांच  तत्त्वज्ञान आहे – "दोघांसाठी एक, एकासाठी दोघं."

फायदे: नाते सुरक्षिततेचे आणि आनंदाचे आश्रयस्थान बनते.

तोटे: जर एका जोडीदाराला अधिक वैयक्तिक स्वातंत्र्याची गरज भासली तर,तणाव निर्माण होऊ शकतो.

2. समांतर जोडपे

समांतर जोडपे,यातील प्रत्येक आपलं स्वतःचं स्वतंत्र जीवन जगतो आणि तरीही नाते टिकवून असतात. उदाहरणार्थ, पती त्याच्या मित्रांसोबत हायकिंगला जातो,तर पत्नी तिच्या मैत्रिणींसोबत सुट्टीचा आनंद घेते.

फायदे: भरपूर स्वातंत्र्य आणि कमी वाद.

तोटे: भावनिक जवळीक कमी होण्याची आणि असण्याची शक्यता.

3. वादग्रस्त जोडपे

"वादग्रस्त जोडपे", ह्या जोडप्यातील जोडीदार, प्रत्येक गोष्टीवर वारंवार वाद घालतात, परंतु त्याचप्रमाणे ते तीव्रतेने एकमेकांवर प्रेमही करतात. त्यांच्यातील वाद कधी कधी नात्याची गरज असते.

फायदे: उत्साहपूर्ण नाते आणि खऱ्या भावना व्यक्त होतात.

तोटे: अशा वादांमुळे भावनिक थकवा येऊ शकतो.

4. साथीदार जोडपे

साथीदार जोडप्यांना "टीम" म्हणून ओळखले जाते. हे जोडपे एकमेकांना बिनशर्त पाठिंबा देतात आणि नातं प्रामाणिकपणे टिकवतात.

फायदे: संतुलन आणि आत्मविश्वास निर्माण होतो.

तोटे: कधीकधी नात्यातील भावनिक भाग,इतका मजबूत होतो की शारीरिक इच्छा कमी होते.

5. पट्टी जोडपे/बांधलेले जोडपे:

पट्टी जोडपे किंवा बांधलेले जोडपे,हे दुःखातून उभे राहते उदाहरणार्थ ब्रेकअप,शोक किंवा विश्वासघातानंतर.हे जोडपे एकमेकांना आधार देते आणि एकमेकांच्या वेदना समजून घेते.

फायदे: खोलात जाऊन ऐकण्याची क्षमता आणि खरा आधार मिळतो.

तोटे: न भरलेल्या जखमेवर नाते बांधल्यामुळे दीर्घकालीन तणाव येऊ शकतो.

समारोप:

गिल्बर्ट बो जौदे यांची टायपोलॉजी ही एक विचार करण्याची चौकट आहे.जोडप्यांचे नाते कालांतराने बदलत जाऊ शकते.म्हणजे,कधी एक फ्यूजन जोडपे,समांतर जोडप्यांमध्ये बदलते,तर कधी वादग्रस्त जोडपे स्थिर साथीदार बनतात.या बदलांमध्ये नात्याचे स्वरूप समजून घेणे आणि गरजांशी जुळवून घेणे महत्त्वाचे ठरते.

यासाठी  नेमके काय करणे जरुरीचे आहे,तर एकमेकांच्या भावना समजून घेणे,एकमेकांच्या गरजांचा आणि विचारांचा सन्मान करणे, नात्यातील चांगल्या गोष्टी ओळखणे,नात्यात येणाऱ्या अडथळ्यांवर काम करणे.शेवटी, योग्य नाते म्हणजे,जिथे तुम्हाला स्वतःसाठी सुरक्षित,आत्मविश्वासू आणि पूर्ण वाटते, होय.  

आजचा ब्लॉग तुम्हाला कसा वाटला ते, कमेन्ट बॉक्स मध्ये जरूर जरूर लिहा. पुनः भेटूया उद्याच्या ब्लॉगमध्ये तोपर्यंत आपली आणि आपल्या परिवाराची काळजी घ्या.स्वस्थ रहा,आनंदी रहा,मस्त जगा.  

प्रसाद नातु, पुणे.