महिलांनी 45 व्या वर्षा नंतर करावयाच्या टेस्ट

ब्लॉग सं. 2025/142

दिनांकः 23 मे, 2025. 

 मित्रांनो, 

            महिला या एकंदरीतच जास्त काटक असतात,असं पूर्वीपासून मानलं जातं.पण हा समज असेल किंवा वास्तविकता,यामुळे त्या स्वतःच्या आरोग्याबाबत उदासीन असतात आणि बऱ्याच गोष्टी अंगावर काढतात. त्यांना काही त्रास होत असेल तर कुणाला सांगत देखिल नाहीत. पण यामुळे काही वेळा एखाद्या लहान दुखण्याचे मोठ्या दुखण्यात होऊ शकते.आजचा ब्लॉग हा महिलांना डोळ्यासमोर ठेऊन लिहिला आहे.             

सविस्तर:

महिलांमध्ये वयाच्या 45 नंतर हृदयविकाराचा धोका मोठ्या प्रमाणावर वाढतो.बदलती जीवनशैली, हार्मोन्समधील बदल आणि वाढत्या वयानुसार उच्च रक्तदाब, कोलेस्टेरॉल आणि हृदयविकारासारख्या समस्या सामान्य होत आहेत.त्यामुळे हृदयाच्या आरोग्याची काळजी घेणे अत्यंत गरजेचे आहे. डॉक्टरांच्या मते, नियमित आरोग्य तपासणीमुळे हृदयविकार वेळेवर ओळखता येतो आणि गंभीर स्थिती टाळता येते. वयाच्या 45 नंतर महिलांनी कोणत्या महत्त्वाच्या चाचण्या करून घ्याव्यात याची माहिती खाली दिली आहे.

1. लिपिड प्रोफाइल चाचणी:

लिपिड प्रोफाइल चाचणीद्वारे शरीरातील कोलेस्टेरॉल आणि ट्रायग्लिसराइड्सची पातळी तपासली जाते. शरीरातील 'वाईट कोलेस्टेरॉल' (LDL) वाढल्यास, तो धमनीत जमा होऊन रक्तप्रवाहात अडथळा निर्माण करू शकतो, ज्यामुळे हृदयविकाराचा झटका येण्याचा धोका वाढतो. वयाच्या 45 नंतर प्रत्येक महिलेने ही चाचणी वर्षातून एकदा करून घ्यावी. लिपिड प्रोफाइलमध्ये खालील गोष्टींचा समावेश असतो.

Total Cholesterol                                           < 200  

Triglycerides                                                  < 150

HDL Cholesterol                                            40-60 च्या मध्ये

LDL Cholesterol                                            < 100    

2. रक्तदाबाची तपासणी:

उच्च रक्तदाबाला 'मूक घातक' (Silent Killer) म्हणतात, कारण त्याची स्पष्ट लक्षणे नसतात. अनियंत्रित रक्तदाबामुळे हृदयावर जास्त ताण येतो,ज्यामुळे हृदयविकार आणि स्ट्रोकचा धोका वाढतो.45 वयापुढील महिलांनी नियमितपणे रक्तदाब मोजून कोणतीही असामान्यता आढळल्यास डॉक्टरांचा सल्ला घ्यावा.Blood Pressure हे 120/80 असले पाहिजे.रक्तदाबासोंबत तुमच्या हृदयाचे ठोके हे सामान्यतः 60 ते 100 यामध्ये असावेत असे म्हटले जाते.    

3. ईसीजी (ECG):

हृदयाचे ठोके आणि विद्युत प्रवाह तपासण्यासाठी ईसीजी चाचणी केली जाते. या चाचणीमुळे अनियमित हृदयाचे ठोके (Arrhythmia) आणि हृदयविकाराची सुरुवातीची लक्षणे ओळखता येतात. थकवा, छातीत दुखणे किंवा श्वास घेण्यास त्रास होत असल्यास डॉक्टरांचा सल्ला घेऊन ईसीजी चाचणी करून घ्यावी.

4. रक्तातील साखरेची चाचणी:

मधुमेह आणि हृदयविकार यांचा जवळचा संबंध आहे. रक्तातील साखर पातळी जास्त झाल्यास हृदयाच्या धमण्यांचे नुकसान होऊ शकते, ज्यामुळे हृदयविकाराचा धोका वाढतो. त्यामुळे महिलांनी 45 वयानंतर नियमितपणे फास्टिंग ब्लड शुगर आणि HbA1c चाचणी करून रक्तातील साखर पातळी तपासावी.जे मधुमेही नाहीत,त्यांचे HbA1c  5.7 < इतके असावे.  

समारोप:

मित्रांनो,मी ही इथे माहिती केवळ जागरूकता निर्माण करण्यासाठी दिली आहे. आरोग्यविषयक कोणतीही माहिती वाचल्यानंतर,ती अंमलात आणण्यापूर्वी डॉक्टरांचा सल्ला नक्की घ्या.पण एक गोष्ट जरूर सांगेन जे पूर्वीपासून सांगितले गेलेले आहे.Precaution is better than Cure. मग त्यासाठी आपले थोडे पैसे खर्च झाले तर चालतील.पैसे महत्वाचे नाहीत तर जान बची लाखों पाये.        

आजचा ब्लॉग तुम्हाला कसा वाटला ते, कमेन्ट बॉक्स मध्ये जरूर जरूर लिहा. पुनः भेटूया उद्याच्या ब्लॉगमध्ये तोपर्यंत आपली आणि आपल्या परिवाराची काळजी घ्या.स्वस्थ रहा,आनंदी रहा,मस्त जगा. 

 

 

प्रसाद नातु, पुणे.