शेगांवीचा राणा आळंदीत

 Blog No. 2023/38    

Date: 14th, February 2023.

मित्रांनो, 

            काल म्हणजे 13 फेब्रुवरी,2023 ला संत श्री गजानन महाराज यांचा प्रगट दिन होता. हा दिवस श्री गजानन महाराज संस्थान शेगांव येथे मोठ्या दिमाखात साजरा केला जातो.शेगांवला अलोट गर्दी असते.आजकाल जागोजागी गजानन महाराज मंदिर स्थापन केले आहेत. तिथे हा उत्सव साजरा केला जातो.पण प्रत्यक्ष श्री गजानन महाराज संस्थान,शेगांव ह्यांनी उभारलेले एक सुंदर मंदिर आळंदी-देहू रोड वर आळंदी येथे आहे.काल तेथे जाऊन दर्शन घेतले. तसे मी तिसऱ्यांदा ह्या मंदिरात गेलो.पण तेव्हा ब्लॉग लिहीत नव्हतो.आता लिहायला सुरुवात केली आहे.तेव्हा म्हटलं आज ह्या मंदिरावर ब्लॉग लिहू.पश्चिम महाराष्ट्रात जी महाराजांची भक्त मंडळी रहाते.त्यांच्यासाठी हा ब्लॉग उपयोगी ठरेलआणि माझी श्री गजानन महाराजांच्या चरणी तेवढीच सेवा. 

श्री गजानन महाराज संस्थान, आळंदी                 

                पुणे रेल्वे स्टेशन पासून साधारणतः 19 किमी अंतरावर आळंदीत शिरता शिरता, देहू आळंदी रस्त्यावर हे संत श्री गजानन महाराजांचे सुंदर मंदिर उभारण्यात आले आहे.आळंदीकडून देहूकडे जाताना चौकापासून अवघ्या 200 मीटर अंतरावर डाव्या हाताला हे मंदिर आहे.मला ह्या मंदिराचे लोकेशन खूप आवडले.हे देहू आळंदी रोडवर आहे."ज्ञानदेवे रचिला पाया तुका झालसे कळस " ह्या दोन महानुभावांच्या मधे शेगावीच्या राणाचे  मंदिर, प्रवेश द्वारातून शिरल्यावर दुरुनच टेकडी वरील मंदिराचे दर्शन होते.मंदिरासारख्या पवित्र आणि प्रसन्न जागी लागणारी स्वच्छता आणि पावित्र्य येथे अनुभवास मिळते,ते वाखाणण्यासारखे आहे.जसे शेगावच्या मंदिरात अनुभवयास मिळते अगदी तसेच. 

              प्रवेश द्वारातून आंत गेल्यावर मंदिराकडे जाण्याऱ्या रस्त्याच्या दोन्ही बाजूला भक्तनिवास आहेत.त्यांना नावे संत ज्ञानेश्वर, संत तुकाराम ह्यांची दिलेली आहेत. उजव्या हाताला महाप्रसादासाठी हॉल आहे.प्रगट दिन आणि ऋषि पंचमी सोडून इतर दिवसही इथे महाप्रसाद दिवसभर मिळतो.सगळीकडे शिस्त पहावयास मिळते.गर्दी कितीही असली तरी कुठेही गोंधळ नाही,वादावादी नाही."चला पुढे चला पुढे" अशी ढकलाढकली नाही.अगदी ज्या प्रसन्न मनाने घरुन निघालो असतो तो मुड कायम ठेऊन दर्शन घेता येते.मंदिर टेकडीवर असल्याने पायऱ्या चढून वर जावे लागते.मधून मधून बसायला बेंच ठेवले आहेत.सर्वात वरच्या मजल्यावर मंदिर,त्या खालच्या मजल्यावर गादी आणि पादुकांचे दर्शन होते.पोथी वाचनासाठी हॉल आहे.त्या खालच्या मजल्यावर गजानन महाराजांची पोथी,फोटो वगैरे विक्रीसाठी एक ऑफिस आहे.चपला ठेवण्यासाठी मोफत व्यवस्था आहे. तसेच हात पाय धुण्यासाठी व्यवस्था आहे,पिण्याच्या पाण्याची व्यवस्था आहे.तिसऱ्या मजल्यावर पोहोचल्यावर मंदिराचा परिसर बघावयास मिळतो.तिथून परिसर खूपच सुंदर दिसतो.  भक्तनिवासाच्या मधे एक भजन कार्यक्रमासाठी देखिल एक हॉल आहे.  

वाहतुकीची साधने 

   स्वतःची कार घेऊन आलात आणि भक्तनिवांसात उतरलात तर आवारातच पार्किंगची व्यवस्था आहे.अन्यथा रोडच्या बाजूला कार पार्क करता येते.पुणे रेल्वे स्टेशन आणि शिवाजीनगर रेल्वे स्टेशन पासून पीएमटीच्या बसेस उपलब्ध आहेत.तुम्ही स्वतःची कार घेऊन  औरंगाबाद-नगर रस्त्याने आलात तर लोणीकंदहून आळंदीला सरळ रस्ता आहे.थोडा खराब आहे,कारण त्याचे काम सुरु आहे.नासिककडून आलात तर मोशीहून देहू आळंदी रस्त्याला डाव्या हाताला आळंदी आहे. मुंबईहून आलात तर नासिक फाट्याने सरळ पुणे-नासिक रोडने भोसरीपर्यन्त येऊन उजव्या हाताला आळंदीकडे येऊ शकता किंवा मोशीपर्यन्त येऊन देहू आळंदी रस्त्याने उजव्या हाताला वळून आळंदीला पोहोचू शकता. कोल्हापूरहून आल्यास जुन्या मुंबई-पुणे रस्त्याने आळंदीकडे जाणारा रस्ता आहे. त्याने येऊ शकता. 

सारांश 

       मला आजवर नोकरीच्या निमित्ताने वेगवेगळ्या ठिकाणी रहायचा प्रसंग आला. वेगवेगळ्या ठिकाणची श्री संत गजानन महाराज मंदिरे पहाण्यात आली. पण शेगावच्या मंदिरात दर्शन घेण्याचा जो आनंद आहे,तो फक्त आळंदीच्या मंदिरात मिळाला.कारण ते शेगांवच्या संस्थानचे मंदिर आहे. त्यामुळे शेगांवची शिस्त,स्वच्छता,पावित्र्य,मांगल्य हे सारे जपण्याचे कार्य ह्या मंदिरात संस्थांनाकडून घेतले गेले आहे.खरं पाहता "देव साऱ्या चराचरी व्यापला आहे.अगदी आपल्या घरी सुद्धा.हे मी मानतो.रामदास कामतांच्या एका भक्तिगीतात जे म्हटले आहे "कशासाठी येऊ देवा तुझ्या मंदिरात,मूर्ती तुझी असते माझ्या नित्य अंतरात" हे देखिल मी मानतो.पण मंदिरात जाऊन दर्शन घेतल्याने जे मनाला आत्मिक समाधान मिळतं,ते अलौकिक असेच असते. संत श्री गजानन महाराजांना मी माझे गुरु मानले आहे. जीवनात गुरु एकच असावा असे म्हणतात.मी इतर संतांच्या मंदिरात जाऊन दर्शन घेतो.पण जसा शाळेत क्लास टीचर हा एका वर्गासाठी एकच असतो,तसेच गुरुच्या बाबतीत असायला हवे.असे मला वाटते. तर मित्रांनो आळंदीच्या मंदिराला अवश्य भेट द्या. तुम्हाला मिळणारा आनंद मला मिळालेल्या आनंदापेक्षा नक्कीच वेगळा नसेल ह्याची खात्री आहे, "जय गजानन श्री गजानन"      

प्रसाद नातु.